Politikk, no også på internetta
Random House: Etter at ein viss ambassadør gjerne ville begynne å blogge, tok eg det på meg å sjå rundt etter norske politikarbloggar. Eg er godt fornøgd med å gjere slikt i arbeidstida. Det er ikkje allverda å ta av mellom dei norske. Det finst ingen norsk Carl Bildt. Men fylkesordføraren i Sør-Trøndelag har faktisk ei bra side, uansett kor lite tiltalande den setninga er (det hjelper at han, som meg, har ei usunn interesse for amerikanske val). Den unge, lovande Paul Chaffey driv no også på. Imponerande postefrekvens, må eg seie, i forhold til andre eg kjenner nokså godt.
Anna: Frp-infiltrasjonen frå ein talentfull gjeng i Bergen Ap er verkeleg eit kapittel for seg sjølv. Men i alle tilfelle, kan ikkje media slutta å rapportere det at Siv Jensen er sjokkert som ein nyheit? Den einaste som kunne vere sjokkert over det er, vel, du veit. Spenninga knytter seg utelukkande til i kva grad det kan kombinerast med den alltid sjarmerande variasjonen over temaet “indignert, forulempa, oppbrakt, såra, skuffa” og kva har ein. Salige John Alvheim har tydelegvis lært vekk eit triks eller to. Men eg forstår jo godt at det er vanskeleg når alle er ute etter ein heile tida.
3 years ago